МЕКТЕПКЕ КАБЫЛ АЛУУ 2023
1-класска электрондук каттоо // Мектепке каттоого өтүнмө берүү
2023-2024 – окуу жылына 1-класстын балдарын электрондук каттоонун тартиби жөнүндө маалымат.
2023-2024 — окуу жылына балдарды биринчи класска электрондук каттоо mektep.edu.gov.kg сайтында төмөнкү графикке ылайык жүргүзүлөт:
- Биринчи этап —жашаган жердин юридикалык дарек боюнча (туруктуу каттоо боюнча) 2023-жылдын 10-апрелинен (9.00) 25-июнга чейин;
- Экинчи этап — жашаган жери боюнча (каттоого карабастан) – 2023-жылдын 26-июнунан (9.00) 31-августка чейин.
Арыз берген ата-эненин/мыйзамдуу өкүлдүн инсандыгын ырастоочу документтери (паспорт, баланын туулгандыгы тууралуу күбөлүк), ата-эненин/мыйзамдуу өкүлдүн жана баланын жеке идентификациялык номери (ЖИН) болбосо, баланы мектепке каттоого мүмкүн эмес!
2023-жылдын 10-апрелине чейин ата-энелер/мыйзамдуу өкүлдөр төмөнкүлөрдү даярдашы керек:
— паспорт;
— баланын туулгандыгы тууралуу күбөлүк;
— жеке идентификациялык номер (ЖИН/ПИН — ата-эненин/мыйзамдуу өкүлүнүн жана баланын паспортунда көрсөтүлгөн 14 сандан турган идентификациялык номер. Ал жок болгон учурда жашаган жери боюнча калкты тейлөө борборуна (КТБ/ЦОН) кайрылуу керек.
— Мамлекеттик каттоо кызматынын электрондук порталында каттоо дарегинин болушун текшерүү.
Программалык деңгээлдеги система жарандардын төмөнкү жеңилдетилген категорияларына артыкчылык берет:
— үй-бүлөлөрүнүн жашаган жери боюнча аскер кызматчыларынын балдары;
— тиешелүү күбөлүк көрсөткөндө Кыргыз Республикасына көчүп келген жана кайрылман статусуна ээ болгон этникалык кыргыздардын балдары;
— үстүбүздөгү жылдын 15-сентябрына карата ушул жалпы билим берүү уюмунда бир жылдан кем эмес иштеген мектептердин мугалимдеринин жана кызматчыларынын балдары.
2023-жылдын 10-апрелине чейин аскер кызматкерлери, кайрылман статусуна ээ болгон этникалык кыргыздар, мугалимдер жана мектеп кызматкерлери баланы мектепке каттоо учурга карата жогоруда аталган документтерге кошумча иштеген жеринен маалымкат (справка) даярдашы керек.
Ата — эне/мыйзамдуу өкүл баланы биринчи класска кабыл алуу жөнүндө билдирме алгангандан кийин, учурдагы жылдын 1 — августунан баштап 10-сентябрынан кечиктирбестен мектепке төмөнкү тастыктоочу документтерди берүүгө милдеттүү:
— мектепке кабыл алуу жөнүндө ата-энелеринин/мыйзамдуу өкүлдөрүнүн биринин арызы;
— баланын жана ата-энелеринин/ мыйзамдуу өкүлдөрүнүн биринин инсандыгын ырастоочу документтери — нотариалдык жактан күбөлөндүрүлгөн баланын туулгандыгы тууралуу күбөлүгү жана ата-энелеринин/мыйзамдуу өкүлдөрүнүн биринин паспорту;
— ден соолугунун абалы жөнүндө медициналык маалымкаттын түп нускасы (белгиленген формалар);
— алынган эмдөөлөр жөнүндө медициналык маалымкаттын түп нускасы (белгиленген формалар);
— баланын 3х4 см өлчөмүндөгү сүрөтү.
1 — августан баштап 10-сентябрга чейин мектепке тастыктоочу документтерди алып барбаган учурда бала 1-класска кабыл алынбайт!